Ndang au i Bapak...ndang au i Omak...

NDANG AU I BAPAK….NDANG AU I OMAK….

Parompuan na marhuaso do tumpal ni harajaanna, alai songon bisa na manggagat tu holiholina do anggo parompuan sibahen haurahon. (Poda 12 : 4)

 

Asi do roha molo adong dakdanak, atik pe naung lam magodang, alai maol mampartahanhon pingkiranna mangalusi sungkunsungkun ni guru di sikola na. Molo masa sisongoni aha do mambahen i ?

Lao patorangkon i, hea do sada barita na manarik begeon, jala geok. Ala ninna godangan do pangalaho sisongoni ditontuhon pangalaman ni dakdanak i tingki di jabu, tarlobi ala ditindos Amana manang Inana di jabu. Hea do pengalaman ni sahalak dakdanak baoa songoni.

Di jabu ganup ari do ibana hona badaan. Molo adong na mago, pintor sai ibana do disangka Inana mangulahon i. Okui nuaeng, ningku. Ho do mambuat tintinhu nangkin hupeakkon di ginjang di meja on. Molo dialusi anakna i mandok, ndang au I Omak, habis ma ibana digotili dohot dibalbali. Sombahu, ndang au mambuat i, dungi habis ma ibana hona lili. Manang aha pe na masa dijabu, sai ibana do ditudu mangulahon i. Molo habis indahan manang jagal arian, pintor pinggol ni ibana do ditarik-tarik inana. Jala hona hata na koras situtu. Habis sude dirojanhon ho, ate. Molo dialusi ibana, ndang au i Omak, habis ma muse ibana dimuruhi, digotili, jala diusir sian jabu. Jadi pangalaho sisongoni, ndang longkang be i sian parningotanna. Nungga tung tarpasi, nungga tung tarutok i bagas hian taruhir tu rohana dohot marungkor tu bagasan pingkiran primitip na.

Hansit hian do molo sanga halak sahat tu pengalaman sisongoni dingolu ni dakdanak. Sipata ndang apala mullop i ganup tingki, alai molo adong pengalaman na sarupa na hira mamaksahon ibana ingkon mangalusi, disi ma tompu mullop i sian pingkiran parbagasanna. Nang pe boi sipatasipata tartahan ni halak i asa unang mullop pengalaman sian sihaetehon i. Alai sipata tudos do songon borsang ni kopi na dipaindo di galas. Dung leleng kopi i di galas i, mido ma deba, alai laos na umpangket nai turun ma tu toru. Tarlobi molo ngali kopi i, borsang nai pangket ma i.

Alai molo ro siinum kopi i, lao mangkoncok i disi ma pintor nangkok muse borsang ni kopi i tu ginjang. Songoni ma nang pengalaman ni sahalak dakdanak nang pe naung dewasa ibana, gariada nang pe naung sahat tu na matua ibana, boi do manombo angka pangalaho na sarupa sisongoni.

I ma na masa tu dakdanak baoa i tingki SMA ibana. Na mullop do pengalaman sihaetehon nai. Na marbonsir do I, uju hea sahalak guru na manungkun angka murid na. songonon : ise sian hamu na umboto, ise ma manurathon dekrit Presiden. Ala so adong na martudu, gabe tubu ma roha ni guru i mangungkun tu sada halak sian murid nai. Ditudu guru ma si bayo i, ima dakdanak na sai jotjot disangka Inana i sian sihaetehon na i. Dung diulahi Guru i sahali nari mandok tu ibana, tung denggan do dialusi ibana, jala mansai hatop situtu. Alushu Guru nami, “ndang au i Bapak Guru”. Ro ma  muse Guru i manungkun sian longang ni rohana. Ndang ho na husungkun, alai ise manurathon dekrit Presiden i. Alus na hot songon siparjolo i, “tung singtong ni na mangolu guru nami, ndang au Bapak Guru manurat i.” Lam muruk ma guru i mandok hata na, lam angka dotdot dakdanak i, jala tanpa sadar sai didok ibana lam hatop: “ ndang au i Bapak,…ndang au Bapak…,ndang au Bapak.” Gabe bingung sandiri ma Guru, au do na loakon ulaning, manang naung rintik do dakdanak on, ninna rohana dibagasan. Ai naung loakhon do ho huroha, ninna guru i.

Bingung guru i, sian muruk ni rohana didok ma:  “antong mulak ma ho, ndang boi be ho marsikkola dison, saleleng so diboan ho natoras mu tuson.” Mulak ma ibana tu jabu, hape antar jam 9 manogot dope tingki i. Dung sahat dijabu didok Inana ma, ai beasa mulak ho amang, ai ndang sikkola ho, naung libur do hamu? Sikkola do Omak, alai disuru guru do au mulak. Ninna, ndang boi be au sikkola disi saleleng so ro Omak mandapothon guru i. Ba, aha huroha na masa, aha salam Amang. Ndang dipaboa guru i. Annon ma dipaboa guru i ninna tu Omak. Antong molo songoni lao ma hita, nungga ganjing tutu i. Dung songoni borhat ma nasida. Nungga di kantorna hundul guru i margundokpong. Disi sahat tu sikkola i pintor langsung ma Ina dohot dakdanak i manjumpangi guru i. Nungga mombun be nang rimas ni guru i. Dijangkon do nasida mansai uli.

Didok Inanta i ma manungkun guru i, ai tung apala aha do Bapak huroha sala ni dakdanak on. Dialusi Guru i ma, nian ndang apala na sala Ibana, alai tung na so huantusi do alaus na mangalusi sungkunsungkunhu. Aha huroha sungkunsungkun ni Bapak tu dakdanakhon, ninna Omak ni dakdanak i. Diulahi Guru i ma sungkunsungkun na i. On do husungkunhon tu ibana. Ai ise do diboto ho na manurathon Dekrit Presiden ni Indonesia. Holan dibege Omak nai songoni. Ninna ma, molo i do hape tutu sungkunsungkun ni gurui, aha ma maol ni i. Alai humusor ma Omakna i disungkun ma anakna i. Atehe anaha, aha huroha didok ho mangalusi. Ai ise do huroha tutu manurat Dekrit ni Presiden i, na ho do Amang manang ndang ho. Molo ho do antong, ba okui ma.

Dialusi dakdanak i ma muse tu Inana i. On do hudok Omak tu Guru i, ndang au manurat i Bapak. Dungi didok Bapak Guru muse, ndang ho na hudok, ise manurathon dekrit ni Presiden. Alushu hot do Omak, ndang au ningku do.

Dung songoni gabe didok Inana i ma tu Guru I mardongan muruk. Ai dia do tutu, didok si adui on ai so ibana. Molo so ibana do antong, beasa muruk Bapak i. Ai so ibana ninna, antong Bapak i do manurathon i hape. Holan didok Inanta i songoni, hohom ma guru i, na dos do hape hamaloon ni nadua on, ninna dibagasan rohana. Diorom ibana nama muruk na, gabe didok Guru i ma, ima tutu Inang, ndang ibana Inang na sala tutu, au do na sala ninna guru i. Ai husungkun sungkunsungkun na so tangkas diboto dakdanak on. Hape Inang pe dos do alusmu. Ala Inang pe ndang huantusi, jadi… mulak ma hamu, ninna Guru i. Guru i pe mulak ma, jala sai mangupirupir. Mulai sian i, gabe sai marpingkir ma Guru i, ai beasa songon i ulaning, loak nasida.

Dung pe leleng ditangkasi Guru i, asa diboto aha sialana. Dungi dapot ibana ma alusna. Na boi do hape hakorason na nialaman ni halak sian sihaetehon na manggompang dingolu ni halak sahat tu na magodang. Ala ni manat ma hita natua-tua mangajari ianakhonta. Unang sai tapaksa ianakhonta mangokui na so ibana mangulahonsa. (dari : "Gait na pabidang panatapan" Pdt. Nelson F Siregar)